FRÉTTIR FRÉTTIR FRÉTTIR!!!!

Er fluttur á nýjan og betri stað!! (ekki það að þessi hafi verið slæmur) Alltaf gaman að flytja í nýtt umhverfi og nýjan íverustað sem maður hefur hannað og byggt upp sjálfur...(með smá hjálp...fyrirgefðu Mikki)

Hér eftir mun ég skrifa á eigin heimili og bið ég lysthafendur að flytja sig þangað, og breyta linkum þeir sem það vilja.

Ég þakka Blogspot kærlega fyrir að skjóta yfir mig skjólshúsi hingað til og það án endurgjalds!! Þessi síða mun hugsanlega þjóna mér sem sumarbústaður í framtíðinni.... þ.e. ef ég fer í sumarfrí sem verður bara að koma í ljós.

Sé ykkur hinumeginn!! (já ....vonandi í tvennum skilningi þegar yfir lýkur...! fer eftir því hver er áfangastaður hvers og eins)

Já ....hér til hliðar, á tenglalistanum stendur undirritaður, þar er ég núna!

Pálmi Gestsson

Erlingur Brynjólfsson....
...sendir mér hlýjar kveðjur á síðunni sinni. Fyrir þær skal þakkað. Ennfremur hvetur hann til samstöðu, og tek ég þeirri áskorun og leyfi mér að tengja hann minni síðuog endurgjalda þannig hans tengingu...(hm...já ættum að vera vel tengdir drengirnir.)

Jú Erlingur... mig rámar í Gullbrand karlinn. Það er eitt af mínum fyrstu verkum eftir útskrift. Það gleður mig að við Gullbrandur skyldum geta veitt einhverjum ánægju á sínum tíma.

Denni...
...vinur minn kann að stýra penna! (þetta er auðvitað flestum sem eitthvað þekkja til hans löngu ljóst) Nýjasta afurð hans í bloggheimum sýnir þetta svo ekki verður um villst. Baugskafli Denna, að ég tali nú ekki um "Greenkaflinn" (skiljist eftir framburði) er hreint óborganlegur. Ekki einungis er hann hárbeittur og og firnavel skrifaður, heldur svo grínaktugur að svíður undan. Ekkert er eins beitt í þjóðfélagsumræðu eins og háðið. Ekkert er eins alvarlegt og grínið. Ekkert sjónarhorn er eins skýrt, gagnrýnið og beitt eins og það sem horft er á frá sjónarhóli góðs húmors.

Um húmor mætti halda langan fyrirlestur, en það er einhvern veginn með hann eins og annað það sem lifir, ef maður kryfur það drepur maður það....ekki satt?

Að lesa Denna er sáluhjáparatriði!

Erlingur Brynjólfsson......heitir maður (þekki hann ekki) sem bloggar skemmtilega. Greinilega óvitlaus maður. "Svona bloggar maður" segir Erlingur (já...dálítið til í því). Lesa hann!

Vinur minn....
...Jakob Bjarnar Grétarsson sendi mér eftirfarandi bréf sem hann af rómaðri góðmennsku sinni gaf mér leyfi til að birta:

Kæri Pálmi!

Til hamingju með heimasíðuna þína. Skemmtilegt er að sjá hvert hugur Bolvíkingsins snjalla leitar og gaman þegar hann lætur í ljósi skoðanir sínar á ýmsum þjóðfélagsmálum - t.d. Baugsmálinu. Því langar mig til að spyrja þig einnar spurningar og væri gaman að heyra álit þitt: Er hægt að líta svo á að fjölmiðlaumfjöllun sem slík sé refsing í sjálfu sér?

Líklega þarf ég að útskýra þessa spurningu eilítið. Í Baugsmálinu hafa forsvarsmenn fyrirtækisins komið því klárlega á framfæri að rannsókn hins opinbera á bókhaldi þeirra hafi komið af stað umfjöllun fjölmiðla sem svo kostaði þá milljarða í tengslum við samningsaðstöðu. Ef ég skil þetta rétt þá ætla þeir á þeim forsendum í skaðabótamál við ríkið. Einnig varð þessarar skoðunnar vart meðal margra í tengslum við Árna Johnsen málið. Þá var helst að skilja á mörgum að Árni væri þegar búinn að taka út hluta refsingar vegna þess að það væri búið að fjalla svo mikið um hann í fjölmiðlum.

Hvernig horfir þetta t.d. við fjölmiðlaglöðum manni sem á stundum á allt sitt undir fjölmiðlaumfjöllun þegar hann þarf að koma á framfæri mikilvægum upplýsingum við almenning um hina og þessa sýninguna?

(Það má alveg fylgja þessari sögu að sjálfum finnst mér þessi þanki glórulaust kjaftæði og til þess fallinn að skjóta stoðum undir fullyrðingu Göbbels þess efnis að lýðurinn sé bæði heimskur og gleyminn.)

Bestu kveðjur,
Jakob Bjarnar Grétarsson

Alltaf góður, vinur minn bókmenntafræðingurinn. Ég hvet hann hérmeð að koma sér upp sínum eigin fjölmiðli...Þjóðin hefði gott af að heyra það sem hann hefur til málanna að leggja....

Það þarf vart að taka fram að ég er hjartanlega sammála Jakobi...og á köflum freistast maður til að halda, því miður, að Göbbels karlinn hafi farið hættulega nálægt sannleikanum!

Spaugstofan....
...tók formlega til starfa kl 8:30 í morgun. Verkefnin eru ærin, sem þýðir að minni tími gefst til að halda út einkafjölmiðli.

Rjúpnafundur....
...einn herlegur var haldinn í Ráðhúsi Reykjavíkur í gær. Ólafur K Nielsen rjúpnasérfræðingur hélt þar frábæran fyrirlestur um ástand rjúpnastofnsins. Það má ljóst vera að hann (þ.e. rjúpnastofninn) er ekki uppá sitt besta um þessar mundir, og verðum við veiðimenn jafnt sem aðrir að axla okkar ábyrgð og bregðast við af skynsemi og heilindum. Skotvís er búið að fallast á sölubann á bráð sem að mínu mati er vænlegt til árangurs og jafnvel það besta sem hægt er að gera í stöðunni. Það er vitað að 10% veiðimanna veiðir u.þ.b. helming þess sem veitt er. Það er semsagt verið að reyna að taka á veiðum í atvinnuskyni. Menn eru ekki tilbúnir að stytta veiðitímann enda líklegt að slíkt muni ekki skila ásættanlegum árangri; menn munu einfaldlega veiða meira á styttri tíma.

Ekki er vitað hvað veldur nákvæmlega mestum afföllum stofnsins, og telja margir með sannfærandi rökum að þar komi veiðar lítt við sögu. Hinsvegar má einskis láta ófreistað til að komast að því hver affallaþáttanna er atkvæðamestur, þess vegna verða allir að leggjast á eitt og prófa allt sem mönnum dettur í hug að megi að gagni koma.

Hljómsveitin Íslendingar...
...spila fyrir dansi í Borgarleikhúsinu í kvöld á dagskrárhátíð Skjás eins. Ekki er að efa að þar verður mikið fjör!

Vegna tímleysis lík ég hér máli mínu að sinni.

Góðar stundir.

Denni...
...vinur minn hefur vakið athygli á Baugsmálinu á síðu sinni. Orð löngu í tíma töluð. Það er með eindæmum um hvað fjölmiðlaumræðan hefur snúist! Menn hafa áhyggjur af því hvað aumingja Baugsmenn hafa tapað miklu! Það eru þá áhyggjurnar! Ætli sömu menn séu ekki æfir yfir því að Jón nokkur Ólafsson (Skattgreiðandi) sé um það bil að missa æruna vegna forkastanlegra, dónalegra og óafsakanlegra aðgerða skattayfirvalda, þar sem þeir dirfast að gera glæpsamlega rannsókn á fjármálum hans! Að vísu þurfum við hinir að þola svona aðgerðir, en öllum er sama um það eðlilega. Þá eru þeir bara að sinna skyldustörfum!!

Nei lifi Fréttir og réttlátur málflutningur þeirra!

Dagblað alþýðunnar í dag: Innlent | Morgunblaðið | 4.9.2002 | 5:55

23 féllu í þrekprófum Lögregluskólans

Inntökuprófum í Lögregluskólann fyrir skólaárið 2003 er nú lokið og verða 87 umsækjendur boðaðir í viðtal hjá valnefnd skólans á næstu dögum.
Á heimasíðu Lögregluskólans kemur fram að 163 nýnemar sóttu um, 29 þeirra stóðust ekki almenn inntökuskilyrði og því voru 134 boðaðir í inntökupróf. Af þeim féllu 23 í þrekprófum og þrír í bóklegum prófum en 21 umsækjandi mætti ekki prófin og tilkynntu ekki forföll. Eftir eru 87 mun valnefndin velja 40 hæfustu einstaklingana úr þeim hópi.

Það skyldi þó ekki vera að tölvu og pizzu kynslóðin sé komin til starfa!

Kasper...
...hundurinn minn, datt í lukkupottinn í gær. Hinn almenni félagi veiðifélagsins Scmidt&Gestsson,Róbert Schmidt, (ég er stjórnin og nefndirnar.... við erum nebblilega bara tveir í félaginu), bauð heiðursfélaga veiðifélagsins (Kasper) á andaveiðar í gær.

Ekki fer miklum sögum af aflabrögðum, en ef ég þekki hinn almenna félagsmann veiðifélagsins rétt hefur hann örugglega nælt í sitt af hverju, ss stokkönd, urtönd, hvítönd...nei það er víst ekki til. Eitt er víst hann hefur ekki komið heim með haglaskotið í ....já þið vitið hvar!

Aðdragandinn

Róbert vinur minn hringdi í mig seinnipartinn í gær og spurði mig hvort við ættum ekki að fara á önd. Mér fannst það góð hugmynd þar sem ég hef tiltölulega frítt spil næstu daga, svaraði að bragði játandi og beið spenntur eftir því að hann nefndi daginn. Ég þurfti ekki að bíða lengi því hann sagði án þess að vera með neinar vífilengjur:

"Núna"!

Ég: Já ókey.....HA??? Núna??

Hann: Já núna....ég er á leiðinni til þín, vertu tilbúinn eftir svona tuttugu mínútur!!

Ég: Ha...já...ég...nei... ég get það ekki!

Hann: Nú?! Hvurslags veiðimaður ert þú? Maður verður að grípa gæsina (öndina) þegar hún gefst!!
Jæja ég tek þá bara Kasper með fyrst þú kemst ekki!

Ég: ...Já en...

Hann: Alltí lagi...ég kippi honum þá upp eftir augnablik, það er svo gott veður, helv....verður gaman hjá okkur,bless!

Ég ætlaði að fara að segja honum að mér þætti vænt um að fá að vita hvort ég væri að fara í veiðiferð með svona amk tveggja tíma fyrirvara, þó ekki væri meira. En hann mátti ekkert vera að því að diskútera málin, þegar veiðieðlið kallaði, náttúrulögmálin verða að hafa sinn gang.

Svo það fór þannig þennan veiðidaginn að ég sat heima með sárt enni, Kasper fékk að fara!

Gott fyrir hann.

....og Robba...

Um kl. 23:30 er bankað. Ég fer til dyra, og hver stendur fyrir utan yfir sig kátur, með dillandi rófu og Stokkönd í kjaftinum? Robb....nei fyrirgefiði...Kasper!!

Lýkur hér sögunni af fyrstu andaveiðiferð minni í haust!

Ég hlustaði....
...á endurtekinn útvarpsþátt á útvarpi Sögu í gær. Svo sem ekki í frásögur færandi, ég hlusta mikið á Sögu, (nenni ekki að hlusta á sama graðhestalagið á hinum útvarpsstöðunum tuttugu og þremur eða hvað þær eru nú margar) hef gaman af talmáli, gaman af fólki ræða um heima og geima, gaman af hinum misvitru Rögnurum Reykásum sem hringja inn til þess eins, að því er virðist, að opinbera fávisku sína.
(það skal tekið fram að undirritaður á hljómflutningstæki, og notar þau óspart til að hlusta á tónlist sem hann velur sjálfur)

Nú nú...í umræddum þætti í gær var ung kona að ræða við hinn skemmtilega kollega minn og góða leikara Eggert Þorleifsson. Það er undarlegt hvað þessi geðþekka unga kona (var að heyra á röddinni) hafði greinilega lítið haft fyrir því að vinna heimavinnuna sína. Svo lítið, að á köflum efaðist ég um að hún væri með það á hreinu við hvern hún væri að ræða!

Hún spurði td. hvort hlutverkið í kvikmyndinni Dalalíf hefði verið hans fyrsta hlutverk! Þolinmóður og umburðarlyndur svaraðí Eggert því neitandi, sagðist hafa verið búinn þá að leika t.d í "Með allt á hreinu" sem væri kvikmynd eftir Stuðmenn! Eitthvað kannaðist útvarpskonan geðþekka við ræmuna, og rifjaði upp að hún hefði sjálf komið við sögu í þeirri kvikmynd!

Einnig spurði hún viðmælanda sinn hvort hann hefði leikið eitthvað annað en gamanhlutverk! Hann enn jafn umburðarlyndur og þolinmóður upplýsti geðþekku röddina um það að hann hefði nú stundað þetta starf í 20 ár og það væri erfitt að komast hjá því á Íslandi að leika ýmsar gerðir hlutverka ef maður væri á annað borð að fikta við þetta!

Einnig kom það á daginn að blessunin hafði varla séð neitt af því sem hann hafði gert, hvað þá vissi neitt um það!!

Nú er ég ekki að segja að það sé eitthvað sáluhjálparatriði að vera vel að sér í leiklist, hvað þá skylda. En það er lágmarkskrafa til fjölmiðlamanna að þeir hafi einhverja nasasjón af því sem þeir eru að fjalla um, a.m.k hafi skenkt því lítillega þanka þó ekki sé meira sagt!

Víkverji...
...gerir veiðar með hundum að umfjöllunarefni í Dagblaði alþýðunnar í dag. Hann bendir m.a á það að einhver samtök bænda með liðstyrk einhverra annara fordæmi veiðar með hundum og líki þeim við ryksugufrystitogaranna á Íslandsmiðum!!

Mikil er vanþekking manna!! Það skal upplýst hér og tekið undir með Víkverja að það eru lög í siðuðum löndum að menn sem ekki eru með hunda sem hafa staðist lágmarks veiðipróf fá einfaldlega ekki leyfi til að veiða! Hversvegna er það?? Jú af því að þeir sem hafa einhverja þekkingu á þessu máli (það hefur almenningur á Íslandi ekki, hvað þá bændur) vita að það er mikil hætta á því að missa frá sér særð dýr og týna í víðáttum landsins.

Gæs er gjarnan veidd í ljósaskiptunum við tjarnir, ósa og í flæðarmálum, og það segir sig sjálft að að auðvelt er að týna dauðri bráð við slíkar aðstæður, ég tala nú ekki um það sem veiðimenn óttast mest: missa frá sér sært dýr sem bíður þess að deyja, og er jafnvel dögum saman að dragast upp í kvöl. Það á engin lífvera að þurfa að þola. Svo ekki sé minnst á að bráð liggi týnd eins og hráviði um allar trissur.

Nei þess vegna ætti hreinlega að skylda alla þá sem byssuleyfi hafa að vera með hund á veiðum, sem notar sitt frábæra lyktarskyn til að finna það sem týnt er.

Einnig gefur það veiðiferð margfalt gildi unaðar og ánægju að vera með besta vin sinn með sér og vinna saman að því skemmtilega verkefni sem sem veiðar eru.

Að lokum þetta:

SKOTVEIÐIMAÐUR:
4. Beitir ekki veiðiaðferðum sem veitir bráðinni óþarfa kvölum.
a) Skot á að deyða bráðina á augabragði. Til þess að komast hjá því að særa dýr skaltu gæta þess að:
- skjóta ekki af of löngu færi
- ekkert beri milli þín og bráðarinnar
- skjóta ekki nema yfirgnæfandi líkur séu að því að hitta vel.
b) Sært veiðidýr skal aflífa hið skjótasta. Finnist dýrir ekki á skotastað skal einskis látið ófreistað að leita það uppi.

5. Telur fjölda veiddra dýra ekki mælikvarða á góðan veiðimann, eða vel heppnaðan veiðidag.
a) Góður veiðimaður stærir sig ekki af feng sínum og keppir ekki við aðra um fjölda veiddra dýra.
b) Þá er veiðidagur góður þegar hóflega er veitt, með talsverðri líkamlegri áreynslu, vakandi náttúruskyni og sært dýr liggur ekki eftir að kveldi.
(Úr siðareglum Skotvís)

Góðar stundir

Góð ræða...

...hjá Þjóðl.st. Spennandi vetur frammundan, m.a Halti Bill (vinnuheiti) Með fullri reisn (Full Monty) sem verður jólaleikrit og margt fleira spennandi. Áberandi hvað mikið er af nýjum ísl.verkum. Rauðaspjaldið e. Kjartan Ragnarsson og Sigríði Margréti Guðmundsdóttur, Pabbastrákur e. Hávar Sigurjónsson, Laugarvegur brennur e. Bjarna Jónsson ofl ofl.....reyndar er þetta allt hérna. Leikhúsgestir verða greinilega ekki sviknir þetta árið.

Úff....
...var að detta inn á netið aftur! Sambandið rofnaði einhverntíma í nótt, svo ég hef verið með fráhvarfseinkenni síðan!! Kl. er núna 14:15!!

Vonum að þetta hangi inni eitthvað frameftir degi!

Matarveislan...
...tókst vel. Borðaði óhóflega mikið eins og venjulega. Makalaust að maður skuli alltaf borða í hálftíma eftir að maður er orðinn saddur!!

Þjóðleikhúsið...
...verður sett við hátíðlega athöfn í dag kl.10:00. Spennandi að hlusta á stefnuræðu Þjóðleikhússtjóra. Verð margsvísari seinnipart dags.

Sjónvarpið...
...mitt dó í gær, eða ölluheldur lamaðist. Myndin fór en ekki hljóðið! Skil ekkert í þessu, rándýrt tiltölulega nýlegt sjónvarp...veit ekki hvur andsk...er að. Tillögur að sjúkdómsgreiningu vel þegnar.

Stórhljómsveitin Íslendingar...
...leikur fyrir dansi á dagskrárhátíð Skjás eins í Borgarleikhúsinu á fimmtudagskvöld. það verður fjör! (Verð að muna eftir að kíkja í sax-töskuna í dag).

Fór í útvarpsþátt Stefáns Karls Stefánssonar í gær ásamt spaugbræðrum mínum Karli Ágústi og Sigga Sigurjóns. Bulluðum við hann og Eddu Björvins í einhvern klukkutíma. Ég fékk meira að segja að snúa lukkuhjóli svona eins jókerinn er í lottóinu. Skemmtileg reynsla fyrir mann sem vinnur aldrei neitt, að skora lukku annara á hólm.

Konan mín flugfreyjan...(hljómar eins og nafn á endurminningabók...Móðir mín húsfreyjan!!) kom með Kardemommubæinn (cd) heim í gærkvöldi þegar hún kom frá London. Hann var spilaður strax nú í morgunsárið við gífurlegar undirtektir Mímis. Að vísu kann hann nokkur lög úr þessu ágæta bæjarfélagi enda lék faðir hans aldraður Kasper ræningja í hartnær 10 ár! (geri aðrir betur).

Veðrið er að sækja í sig veðrið! (hm..sniðugt). Ég sá ekki betur í gær en allir veðurspámenn sem einhverju máli ná væru að hóta svo snörpum lægðum, tveimur í röð að jafnaðist á við Halaveðrið ógurlega á síðustu öld.

Í dag er meininginn að húsmóðirin í mér fái að njóta sín því við eigum von á foreldrum mínum og systkinum í mat í kvöld. Ekki dugar annað en að vera þjóðlegur og slá undir eins og einum lambsskrokk.

Mikill er máttur auglýsinga. Mímir spurði hvað þetta væri, og benti á lambalæri. Móðir hans svaraði: Lambakjöt. Þá bætti sá stutti við: "Náttúrulega gott"!! Orðaforði hans er að miklu leiti kominn úr sjónvarpinu! Td ef hann sér umslag frá Tryggingamiðstöðinni (rukkun!) á borðinu, segir hann að bragði: "þegar mest á reynir"!! (skerí...!!)

Vísa dagsins:

Hér kemur Aðalsteinn sterki
er í atkvæðaleit handa klerki
má ekki bjóða þér merki
Blindravinafélagsins?

Það skal tekið fram að gullmolar þeir í "bundnu" máli sem hér á síðunni birtast eru ekki eftir mig, heldur snillinga sem hafa vald á lítt kunnum bragarháttum.Yfir þvílíkri þekkingu og snilld hef ég því miður ekki að ráða.

Góðar stundir

Ók utan í vegg í Vestfjarðagöngum
mbl.is

Enginn slasaðist þegar bíl var ekið utan í vegg í Vestfjarðagöngunum í morgun. Bíllinn var talinn óökufær og fjarlægður með krana. Göngunum var lokað í um hálftíma meðan hann var fjarlægður.
Tildrög slyssins voru þau að tveir bílar mættust á einnar akreinar vegarkafla ganganna við gangamunnann Önundarfjarðarmegin. Bíllinn sem lenti utan í veggnum var nýkominn inn í göngin og segir lögregla að þar sé blint horn þar sem kunnugir hafi varann á. Ökumaðurinn var erlendur ferðamaður.

Þetta má lesa í bæði í Morgunblaðinu og BB í dag!

Slitrur vöruðu við þessu í gær!! Sjá hér að neðan. 30.08.'02

Í gærkveldi var ég í fimmtugsafmæli mágkonu minnar Öldu Ólafsdóttur. Alda er eiginkona elsta bróður míns Ólafs Svans. Óli er sá eini af okkur systkinum sem enn býr í Bolungavík. Bróðir minn Þórarinn kom ásamt fjölskyldu sinni hingað á höfuðborgarsvæðið í fyrra, og eina systir mín og hennar fjölskylda fluttust hingað í síðasta mánuði. Það kom reyndar ekki til af góðu, því það á að láta jarðýtu jafna hús hennar þar vestra við jörðu! Hún var nefnilega svo óheppin að fá snóflóðsslettu í gegnum stofuna hjá sér fyrir nokkrum árum. Ekki mjög geðslegt!

Hún og fjölskylda hennar bjuggu nefnilega við rætur Traðarhyrnu (fjallsins míns ) í götu þar sem fimm önnur hús standa; Dísarlandi. Já fimm önnur hús, ekki fimmtíu! Nú skyldi maður ætla að ódýrasti kosturinn í stöðunni fyrir bæjarfélagið væri að kaupa upp þessi örfáu hús og selja þau aftur sem sumarhús eins og gert var í Súðavík og gaf mjög góða raun. En...nei, skynsamlegra fannst þeim sem réðu (hverjir sem það eru nú ) að eyðileggja fjallið góða með því að ryðja upp mörghundruðmiljónkróna moldarhaug og staðsetja hann ofaná þessum örfáu húsum sem þarna stóðu!! Mér þætti dulítið forvitnilegt að heyra rök þeirra ráðamanna fyrir þessum aðgerðum! Einhverntíma heyrði ég að ef þyrfti að kaupa upp nokkra kofa þarna (sem hlýtur að vera ódýrara en að búa til moldarfjall sem kostar milljarð eða hvað nú það er) þá flytti fólkið kannski frá Bolungavík! Þessvegna væri skynsamlegra að byggja bara varnargarð og reyna að halda fólkinu í húsunum, þau væru hvort sem er verðlaus því engum dytti í hug að kaupa einhverja hjalla sem stæðu í skjóli snjóflóðavarnargarðs! Pottþétt aðferð til að koma í veg fyrir fólksflótta! Semsagt: ÁTTHAGAFJÖTRAR!

Hafnarfjörður.

Öll systkini mín hafa af einhverjum ástæðum tekið ástfóstri við Hafnarfjörð. Kannski vegna þess að karl faðir minn talar gjarnan um Hafnafjörð sem eina byggðarlagið á Suðurlandi sem búandi sé í! Það er eins og Hafnarfjörður sé í hans huga eitthvað einangrað fyrirbæri á stór-Reykjavíkursvæðinu og hafi ekkert með höfuðborgarsvæðið að gera! Ekki veit ég hvers vegna. Ekki það að Hafnarfjörður sé ekki ágætur, mér er bara ómögulegt að koma auga á sérstöðu hans í Reykjavík. Já í Reykjavík segi ég, því í mínum huga er Kópavogur, Garðabær, Hafnarfjörður, að ég tali nú ekki um Seltjarnarnes hverfi í Reykjavík eins og Grafarvogur, Breiðholt og Grafarholtshverfi svo eittvað sé nefnt. Ég er uppalinn við að fjall sé í milli sveitarfélaga.

En að Veislunni

Gestur sonur minn var okkur hjónunum samferða á veislustaðinn ásamt kærustu sinni Hildi. Skemmtileg veisla. Kræsingar, ræður, skemmtiatriði, ball.

Eftir farandi samtal átti sér stað á milli
Gests Pálmasonar yngri (22 ára trommuleikara) og
Gests Pálmasonar eldri ( 72 ára byggingameistara):

Gestur eldri: Hvaða hljómsveit er þetta?

Gestur yngri: Þetta er hljómsveitin Upplyfting....

Gestur eldri: Hún er ágæt....

Gestur yngri: já,já ....

Gestur eldri: Allavega betri en Rokkvælerhundarnir.....

Gestur yngri: (á erfitt með sig) Já ætli það ekki bara....

Gestur eldri: Jú........

Vísa dagsins.

Gekk ég inná Eiði
unga mey ég hitti þar.
Þar vaxa blómin blíðu
í vorblíðuni stríðu.

Góðar stundir.

Mér til mikillar gleði er ég farinn að fá viðbrögð við hugleiðingum mínum hér á fjölmiðlungnum Slitrum....Einkar vænt þótti mér um bréf frá Jónum tveim; annar frændi minn Einarsson, hinn stórvinur minn frá Bolungavík, G.Guðmundsson. Sá síðarnefndi tók heilshugar undir pistill minn um rithátt nafnsins á víkinni sem kennd er við bolunga, og lagði til að stofnuð yrðu áróðurssamtök til að reyna leiðrétta þessa hvimleiðu vitleysu. Jón vinur minn sem er virtur Bolvíkingur, hefur búið þar vestra alla sína hunds og kattartíð og rekur trúlega ættir sínar allar götur til Þuríðar Sundafyllis landnámskonu í Bolungavík. Hann hefur að sjálfsögðu alltaf skrifað nafn heimabæjar síns rétt, og skilur ekki (skiljanlega) hvernig í ósköpunum mönnum datt í hug að afbaka það svona!

Stefán nokkur Karl Stefánsson ofurleikari, sendi mér línu og lýsir vonbrigðum sínum með að hans skuli engu getið í hugleiðingum mínum. Stefán virtist sár (skiljanlega) og sór ég og sárt við lagði að úr skyldi bætt, og nú skal það gert:

Stefán Karl Stefánsson leikari og Trommuleikari (og flest annað) er einhver stórkostlegasti listamaður sem Ísland hefur alið. Ekki einungis er honum allt til lista lagt heldur ber hann höfuð og herðar yfir alla kollega sína í víðri veröld og jafnvel þó víðar væri leitað....

Stefán virðist fæddur snillingur, gáfum hans innsæi, góðvild, göfgi, greind, fegurð, lítillæti, hógværð, fagurri hugsun, fegurð í reið...hm....já ...( þetta passar), er viðbrugðið! Hann er í einu orði sagt snillingur! Ég er í rauninni ekki þess verður að fjalla um þessa stóru manneskju á opinberum vetvangi...( ég vona að Guð...fyrirgefið....Stefán fyrirgefi það....)

Stefán: Sáttur?

Sjálfsmorðstilraun?

Í mágagni okkar vestfirðinga Bæjarins besta er eftirfarandi klausu að finna:

Lögreglan á Ísafirði stöðvaði ökumann á 107 km hraða í tvíbreiða hluta Vestfjarðaganganna á ellefta tímanum í gærkvöldi, en leyfilegur hámarkshraði þar er 60 km/klst. Að sögn lögreglunnar var ökumanninum leyft að halda áfram ferð sinni eftir tiltal. Hann hefur verið kærður fyrir ofsaakstur og má búast við háum fjársektum.

Einhverntíma var sagt að besta sjálfsmorðsaðferðin sem fyrirfinndist væri að stíga uppí flugvél frá rússneska flugfélaginu AEROFLOT. Ekkert mat skal lagt á það þar sem undirritaður hefur aldrei stigið uppí flugvél hjá því ágæta flugfélagi. Hitt veit undirritaður að ef fólk er orðið leitt á lífinu er óbrigðult ráð að aka of hratt í Vestfjarðagöngum. Ég verð að segja alveg eins og er að það samgöngumannvirki hugnast mér verst af öllum slíkum sem ég hef reynslu af.

Að aka Hvalfjarðargöngin er eins og að aka innanhús við bestu aðstæður, en Vestfjarðargöngin finnst mér í rauninni kvíðvænlegt að aka. Að vísu eru þau viðunnanleg frá Ísafirði að gangnamótum Flateyrar og Súganda. En hvorir tveggju leggirnir eftir það eru að mínu viti stórhættulegir, og óskiljanlegt afhverju þeir voru ekki hafðir tvíbreiðir eins og mér skilst að verktakinn hafi farið framá svo auðveldara væri að vinna við þau, ss að aka jarðvegi útúr þeim osfrv, og þarafleiðandi ódýrara, held ég að hljóti að vera þegar upp er staðið!

Útskot eru nokkur, sem bílar á vestur leið nota af skiljanlegum ástæðum til að víkja fyrir þeim sem á móti koma. Fyrir óvanan er ákaflega erfitt að gera sér grein fyrir vegalengdum inní göngunum, ég tala nú ekki um með bílljós á fullum styrk í augun. Einn er sá staður sem undirrituðum finnst sínu verstur, síðasta útskotið áður en að gangnamunnanum kemur Flateyrarmeginn. Eftir að framhjá því útskoti er komið er nánast blind beygja að gangnamunnanum, og það segir sig sjálft að ekki er mjög geðslegt að mæta bíl þar á einbreiðum vegi! Litlu mátti muna að ég lenti í árekstri þar fyrir ekki margt löngu.

Ótrúleg skammsýni að hafa göngin ekki tvíbreið alla leið, og að manni virðist eingöngu til að kasta krónunni og spara auranna; pissa í skóinn sinn.

Vinur minn Steingrímur Sævarr Denni VII Ólafsson kemur víða við í ávarpi sínu til þjóðarinnar í dag. M.a minnist hann á þá Bónusfeðga (eða kannski "Snekkjufeðga") sem ég hefði betur prjónað inní pistill minn um Últra-Frjálshyggju! Talandi dæmi um hvernig byltingin étur börnin sín!

Sævarr Denni VII skrifar skemmtilegann stíl og húmorískan. Sérstakt uppáhald hef ég á nýjum þætti hans Fyrirsögn dagsins, og einnig eldri þætti hans: Orði dagsins. Ég les alltaf Fréttir Denna, og verð að viðurkenna, stundum oft á dagI

Steingrímur hefur að vísu gleymt að lesa BB í dag, því þar má finna því miður óskemmtilega hluti sbr Vestfjarðargöng hér að ofan. (Ekki að ég hafi sérstaka ánægju af að vekja athygli á því ) Að vísu virðist allt vera með kyrrum kjörum í paradís bolunganna þessa stundina!

Vísa dagsins:

Blessuð sólin sýnir sig
svona um miðjan daginn.
Það er ekki að marka mig
því að mér er svo illt í hendinni.

Góðar stundir

Vinur minn dr. Sigurður Gylfi Magnússon sagfræðingur er 45 ára í dag. Merkilegur dagur. Dr. Sigurður deilir þessum degi með Jóhannesi nokkrum skírara sem missti höfuðið þennan dag fyrir þó nokkrum árum (Höfuðdagur) Nú hefur doktorinn haldið sínum haus til þessa, en enginn veit sína ævi....Dr Sigurður er þekktur í fræðimannasamfélaginu sem ákafur " Einsögumaður" ( Micro history). Gott ef hann hreinlega innleiddi ekki þessa tegund sagnfræði hér á landi okkur fáfróðum til upplýsingar.

Nú er doktorinn engin micro maður sjálfur, hvorki andlega (að ég held ) né líkamlega, ó nei, hann er tveir metrar á hæð og með ógurlegri mönnum. Okkur dr. Sigurði varð óvenju vel til vina á níunda áratugnum þegar við báðir vorum uppá okkar besta (þó ég sé nú töluvert yngri en hann), og hefur aldrei borið skugga á, ekki einusinni þegar hann hvarf til Ameríku í tæpann áratug til náms... að hans sögn. Svo var vináttan mikil að ég fór sjálfur til Ameríku í nokkur misseri til þess að eiga samfélag við stórmennið, og dvaldi þá í Carnegie Mellon University, sama skóla og hann,...við skúringar.

Dr.Sigurði er hér með árnað heilla þó töluvert roskinn sé, og hvet ég alla sem þetta lesa að kíkja á heimasíðu stórmennisins.

Grasekkill eina ferðina enn! Konan er að fljúga mig vitlausan þessa daganna! Fór til Osló í morgun. En þetta lagast væntanlega í næsta mánuði þegar við hjónin höldum glöði í bragði til dóminikanska lýðveldisins ásamt þeim Mími og Maríu (heimasætunni á heimilinu), þá skal slappað af!

Róbert vinur minn og veiðifélagi Scmidt hringdi í mig á dögunum og var að skipuleggja gæsatúr. Er hann fyrirhugaður um helgina en ég á eftir að athuga hvort ég er laus þá. Róbert, sem er annar helmingurinn af veiðifélaginu Scmidt & Gestsson, er mesti veiðimaður sem ég þekki, enda uppalinn á Súgandafirði þar sem flestir urðu að veiða sér til matar ef þeir ætluðu lífi að halda!

Róbert er mikill öðlingur, listrænn svo eftir er tekið og flestra manna hugljúfi. Ég hvet lesendur Slitra að heimsækja Robba hingað á vinnustað hans.

Setning dagsins: "Það veit aldrei enginn hvar allir eru í þessu húsi!

(undirrtaður heyrði undurfagra símastúlku segja þetta fyrir nokkrum árum. Stúlkan sem var ekkert nema þolinmæðin og seinþreytt til vandræða, hafði greinilega aðeins pirrast þegar hér var komið!)

Góðar stundir.

Bolungavík og Bolungarvík

Vinur minn og andlegur bróðir Steingrímur Sævarr Ólafsson gerir í fjölmiðli sínum Fréttum að umtalsefni nafn á ágætum kaupstað vestur á fjörðum, sem heitir opinberlega af einhverjum dularfullum ástæðum og óskiljanlegum, Bolungarvík. Í framhaldi af því hvetur hann mig til að útskýra þá skoðun mína, af hverju umræddur kaupstaður getur ekki heitið Bolungarvík. Það skal nú reynt í stuttu máli:

Nafnið Bolungavík er dregið af trjábolum sem rak á fjörur þar vestra ( rekavið ). Bolungar þessir lágu í haugum í flæðarmálinu, að því er næstelstu menn greina frá. Ef víkin er kennd við þessa bolunga, í fleirtölu, ( sem menn eru flestir sammála um) hlýtur hún að heita Bolungavík. Annars héti hún Bolungsvík! (eint). Sbr. Hólmavík; ekki Hólmsvík eða það sem kolruglað væri: Hólmarvík! Mér finnst þetta nú liggja svo í augum uppí að ekki þurfi útskýringa við.

Um þetta hefur verið deilt í áratugi a.m.k. Skiptust menn mjög í tvo hópa: með r-i og r-laust. Ekki þekki ég rök r-hópsins ef einhver eru. (ég minnist þess ekki einu sinni að hafa heyrt minnst á nein r-rök). Hvorugur hópurinn vildi undan láta. Að lokum féllust menn á þann Salomonsdóm að hvoru tveggja væri rétt! Sem sagt:smekksatriði. Við það slíðruðu menn vopn sín og ritaði hver að sínum smekk.

Svo ólánlega vildi til á einhverju tímabili síðustu aldar að í forsvari fyrir bæjarfélagið voru á þeim tíma r-menn. Lýstu þeir því yfir opinberlega að Bolungarvík skildi barnið heita á opinberum vettvangi, og rituðu það á alla opinbera pappíra og bréfsefni sem frá bæjarfélaginu fóru. Illu heilli. Nú er nafnið vitlaust ritað víðast hvar og að sjálfsögðu vitlaust borið fram.

Í þessu sambandi má einnig minna á það að ein Bolungavík önnur er til á landinu. Er sú á Hornströndum og heitir vel að merkja Bolungavík alls staðar í rituðu máli. Sama saga virðist gilda um þá Bolungavík, nafn hennar er dregið af rekavið. Engum heilvita manni hefur dottið í hug annað en sú vík væri r-laus!

Ég skora á alla þá menn og konur sem af einhverjum ástæðum þurfa að rita þetta ágæta nafn eða láta það sér um munn fara, að hafa það rétt: BOLUNGAVÍK

Þetta er svona í stuttu máli skýring á því afhverju undirritaður skrifar ekki nafnið á heimabæ sínum vitlaust, hvað þá ber það fram vitlaust.

Fengur þætti mér að því ef einhver vildi tjá sig um málið að hann sendi mér línu með því að stappa á setningunni hér ofarlega til vinstri: Er þér mál? og senda mér póst.

Vinur minn Sævarr vekur einnig athygli á þeim ósköpum sem unga fólkið aðhefst þar vestra, og vitnar í Blað alþýðunnar máli sínu til stuðnings. Undirritðum finnst sárara en tárum taki að svona skuli vera komið fyrir ungdómnum í þessari vestfirsku paradís og umhugsunarefni hvers vegna ástandið er eins og raun ber vitni.

Glæpaborg?

Foreldrar mínir sem enn búa þar vestra komu í bæinn í morgun og sótti ég þau á flugvöllinn eins og góðum syni ber. Faðir minn byggingameistarinn hafði það á orði (sem virðist vera orðinn kækur hjá honum ) að það væri lífshættulegt að vera hér í borginni, svo mikil glæpaborg væri hún orðin! Til að leggja frekari áherslu á orð sín sagðist hann hafa verið búinn að taka til sveðju eina mikla áður en hann lagði af stað að heiman, en hefði illu heilli gleymt henni!

Undirritað afkvæmi hans sem orðið er vant þessum talsmáta glotti útí annað að vanda, og fannst þessi athugasemd kaldhæðnisleg með tilliti til fréttaflutnings fjölmiðlanna í dag! Trúlega er þetta liður í því að reyna að leiða börnum sínum fyrir sjónir (sem hafa flest þar til í síðasta mánuði búið í Bolungavík ) í hvursu slæmt umhverfi þau væru komin!

Það skal tekið fram að mér þykir undarlega mikið um fréttir af ofbeldi og öðrum miður skemmtilegum atburðum þar vestra. Ef mark er á takandi, er samfélagið þar margfalt, margfalt meira glæpasamfélag en allt höfuðborgarsvæðið.

Það er einlæg von og ósk Slitra að linni.

Orðatiltæki dagsins: Að vera með eitthvað í varateskinu!
(Bubbi í boxlýsingu á Sýn)

Góðar stundir.

Frumskógarlögmálið

Ég ætlaði að byrja að æsa mig útaf frjálshyggjunni í gær....en taldi uppað tíu og náði áttum. En nú er kominn nýr dagur með ennþá meiri frjálshyggju og ég tiltölulega rólegur.

Einhver drengjasamtök ungliða Sjálfstæðisflokksins voru að klofna um daginn vegna þess að einhverjum þótti félagsskapurinn ekki ganga nógu langt í frjálshyggjuátt!

Efnilegur ungdómurinn í dag!

Ekki svo að skilja að ég sé neinn kommúnisti. Ég er hlynntur frelsi mannsins, frelsi hugans, frelsi í viðskiptum, að menn uppskeri eins og þeir sái, jafnvel einkaframtakinu í stórum dráttum. Ég held að ef sem flestar stofnanir eru einkavæddar, geti það orðið til þess að einhverjir finni til í buddunni, en það er víst þar sem flestir í dag hafa tilfinningar sínar, og þá einna helst sársaukaskynið. Það virðist nefnilega vera frumskilyrði í dag að menn finni persónulega til í buddunni svo fyrirtæki séu rekinn af einhverri skynsemi og viti. Hverjum er svo sem ekki sama í ríkisstofnunum hvort apparatið er að græða eða tapa? Svo framarlega sem ríkisstarfsmenn eins og undirritaður fá þessi óboðlegu laun sín er þeim rétt sama hvernig stofnuninn gengur að öðru leiti. Í flestum tilfellum. ( Til að forða misskilningi er undirritaður einn þeirra sem ekki er sama um "sína" stofnun enda er það að mörgu leiti vel rekið apparat, þó launin falli undir ofangreinda skilgreiningu)

En þetta getur gengið of langt eins og allt annað.

Nýjasta humynd "últra" frjálshyggjunnar (sem að vísu er ekkert ný) er að einkavæða menntakerfið, menninguna og heilbrigðiskerfið. Það er reyndar í einhverjum mæli þegar hafið. Hafa þeir sem með þessar hugmyndir ganga gert sér grein fyrir því hvað þeir eru að leggja til? Vita þeir t.d. hvað margir lifa undir fátækramörkum!

65. gr. [Allir skulu vera jafnir fyrir lögum og njóta mannréttinda án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis og stöðu að öðru leyti.
(Stjórnarskrá lýðveldisins Íslands)

Ef við ætlum að einkavæða menninguna, menntakerfið og heilbrigðiskerfið, hvað verður þá um þá sem ekki hafa efni á að mennta sig, njóta menningar að ég tali ekki um að leita sér lækninga við sjúkdómum!? Semsagt í bókstaflegum skilningi hefur ekki efni á því að lifa!
Vita þessir menn að þegar eru mikil afföll af góðum námsmönnum einfaldlega vegja þess að þeir hafa ekki efni á að mennta sig!

Nei og aftur nei....Verum frjálshuga, en hverfum ekki aftur til , apasamfélagsins, skepnuskapaparins, FRUMSKÓGARLÖGMÁLSINS!(survival of the fittest) Látum ekki einstaklingshyggjunna ríða öllu á slig. Einangrum okkur ekki í fjósi eigin gullkálfa. Hjálpumst að.Við hljótum að vera manneskjur til að hafa meðlíðan með náunganum, með hvert öðru.
Amen.


Hér ætla ég að gera hlé á máli mínu í bili!

Að öðru

Mímir (sprækur sem aldrei fyrr) fór í sína fyrstu bíóferð í dag. Myndin? Jú..Stúart litli II. Myndin er talsett á íslensku, og talar undirritaður fyrir illfyglið..þ.e. Fálkann. Ég fór að velta því fyrir mér afhverju ég væri alltaf valinn í vonda kallinn! Trúlega tæpkast. Ég hef nú yfirleitt ekki hugsað mikið um þetta áður, en þar sem ég sat með saklausu barninu fannst mér þetta alltí einu ósanngjarnt. Nú fyrr í sumar lék ég Mikka ref í Húsdýragarðinum, var í Mikkabúning og með eyru. Þar var sonur minn líka. Ég fór alveg uppað honum, andlitið ósminkað, bara eyrun, og hann varð hræddur. Nú er ekki um annað talað á heimilinu en Mikka ref, og þann stutta grunar ekki einu sinni að þar hafi faðir hans verðið á ferð! Mikill er er hæfileiki barnana til hreinnar, saklausar og heiðskírrar upplifunnar. Við hin eldri megum öfunda þau af þeim hæfileika.

Eftir nokkra umhugsun þarna í myrku bíóinu komst ég að þeirri niðurstöðu að ég væri heppnari enn aðrir leikarar, þar sem það er miklu skemmtilegra og áhugaverðara að leika vondu kallanna, og svo hitt að blessuð börnin hafa svo miklu meiri áhuga á þeim, og oftar en ekki það eina sem þau muna! ( Sjálfsblekking? )

Nú lifi ég stöðugt með verkum mínum 24 tíma á sólarhring; Mikka ref og illfyglinu í Stuart litla II !

Málháttur dagsins: Ekki er sopið kálið þó útí hólmann sé komið.

Kominn tími til að róa hugann....

Góðar stundir.

Bráðamótaka Borgarspítalans.

Mímir sonur minn er hress og fjörugur strákur. Að vísu full hress á köflum að mati aldraðra foreldra hans. ( faðir hans var ekki síður fjörugur á sínum yngri árum að sögn þeirra sem til þekkja ).

Sá stutti var að því virtist að æfa sig að stinga sér til sunds ofan af sófaborði og fékk full harkalega lendingu með höfuðið á undan að sjálfsögðu, en þannig snúa allir alvöru dýfingamenn þegar þeir sýna listrænar kúnstir sínar. Við þessi tilþrif fékk sá litli svolítið annarlegan lit í andlitið, nokkurskonar græn-grá-hvítan sem virkaði pínulítið óeðlilegur á okkur foreldrana. Þar sem okkur fannst þessi litur ekki fara honum og hann vera óeðlilega rólegur og allt að því vankaður tókum við þá ákvörðun að fara með hann uppá Borgarspítala, sem nú heitir reyndar eitthvað annað.

Það er skemmst frá að segja að okkur var vel tekið á yfirfullri biðstofu Slysavarðstofunnar, sem var þéttsetin, í rauninni úttroðinn af fólki sem átti misjafnlega bágt. Mér flaug í hug Menningarnótt þegar ég sá aðsóknina að þessari vinsælu stofunun. Okkur var tjáð að höfuðáverkar fengju forgang og var kippt beint inní biðleikherbergi fyrir börn, sem er hluti af rannsókninni. Þar er nefnilega fylgst með hvort barnið leikur sér og sýnir eðlilegan áhuga á því sem þar er inni. Það skipti engum togum að minn maður óð beint í leikföngin og þóttist þarna hafa himinn höndum tekið, svo spennandi var þetta notalega herbergi.

Til að gera langa sögu stutta þá fékk drengurinn fljótlega litaraft sem við könnuðumst við, tók gleði sína og var fljótlega útskrifaður með láði og leystur út með gjöfum af læknum og hjúkrunarfólki! Það skal tekið fram að drengurinn er af vesfirsku tröllakyni og kallar ekki allt ömmu sína.... hann skokkar nú stálsleginn hér í kringum mig og raular fyrir munni sér "Hér mætir Mikki sjá" sem samnefndur refur söng í Dýrunum í Hálsaskógi!

Niðurstaðan af þessari heimsókn á Slysavarðstofunna (fyrir utan heilbrigði þess stutta, sem öllu máli skipt) er sú að maður fékk ekki á tilfinninguna núna, eins og maður hefur fengið áður, þrátt fyrir að uppselt væri útúr dyrum, að maður þyrfti að bíða þarna með höfuðið undir hendinni eftir að manni blæddi út áður en hægt væri að byrja að yfirheyra mann um nafn, heimilisfang, skóstærð, nafn maka, tíðni samfara........já og allt það sem maður hafði alltaf á tilfinningunni að skipti meira máli en það hvort maður lifði til morguns! Óvænt og ánægjuleg reynsla.

Steingríms þáttur Ólafssonar

Eins og glöggir lesendur sjá hafa Slitrur skipt um umhverfi. Það kom nefnilega í ljós að það fallega umhverfi sem þær fæddust í reyndist gallað, þannig að ekki var t.d hægt að koma fyrir teljara á síðunni. Þetta fannst ritstjóra afleitt, því hver kærir sig um að vera að skrifa á opinberum vetvangi ef hann veit ekki hvort nokkur les það sem hrýtur undan fingurgómunum!

Nú voru góð ráð dýr...

Jú...! Ritstjórinn fékk snilldarhugmynd ! Habbði að braggði samband við vin sinn og félaga Steingrím Sævarr Ólafsson , þann ósérhlífna mann sem ekkert aumt má sjá eða heyra, og kom hann bókstaflega fljúgandi inní málin eins og frelsandi engill og setti alla ritstjórnina uppá nýtt!

Þetta gerði hann glaður í bragði þrátt fyrir lúmskan grun ritstjóra að hann væri að tapa lunganum úr vinnudeginum við að draga óvenjuklaufskan netverja að landi! Hafi hann laun Guðs og góðra vætta fyrir framtakið sem seint verður fullþakkað.

Hefur óvenju gott hjartalag drengurinn sá.

Frjálshyggja!

Þessi öfgafulla frjálshyggja sem nú ríður röftum.......nei þetta verður að bíða morguns, þetta er orðið alltof langt....!

Orðatiltæki dagsins: Að klóra í bakkafullann lækinn.

Útvarp Reykjavík, dagskránni er lokið, góða nótt.

Grasekkill og einstæður faðir einu sinni enn! Svona er að vera giftur flugfreyju. Annars höfum við feðgar ég og Mímir (tveggja og hálfs) það gott. Að vísu á hann það til að fara seinna að sofa þegar hann er einn með pabba. Ætli við feður séum ekki eftirlátari. (Eða agalausari). Þegar við vorum komnir uppí rúm áttaði hann sig á því að hann átti eftir að signa hundinn (Kasper) og kyssa hann góða nótt, svo hann snaraðist frammúr krossaði blessaða skepnuna í flýti og sagði " Í Jésú afni namen"!

Eins og ég hafði orð á í gær er ég að fikra mig, hálfblindur, áfram í myrkviðum netsins og þá aðallega bloggsins. Í kvöld var mér hinsvegar þeytt inní ómælisdjúp tækninnar, af vini mínum og félaga Sævarr-( i )! góðvini mannanafnanefndar. Hann bókstaflega tók af mér völdin, góðu heilli, og kom mér á kortið sem netverja. Hafi hann ómælda þökk fyrir.

Reyndar er í smíðum heimasíða stíluð á mig sem brátt kemst í gagnið. www.palmi.is Þá þarf ég kannski ekki að halda þessari úti. Heimasíðusmiðurinn er hagur mjög á lyklaborð og heitir Gunnar Freyr Steinsson.

Orðatiltæki dagsins: Að naga sig í handakrikanna

Orðinn sybbinn...best að fara að kúra sig hjá litla augasteininum

Góða nótt.

Er einfaldlega að spá í hvernig þetta virkar. Ekki það að ég ætli að lifa mínu persónulega lífi hérna langt því frá!! er bara að prufa mig áfram!

Annars eru svo margir farnir að gera þetta þannig að maður kemst ekki hjá því að smitast, enda dáldið skemmtilegt. Sérstaklega finnst mér skemmtilegt að lesa það sem hann Sævarr vinur minn skrifar.

Einkum gæti þetta verið skemmtilegt og gagnlegt, þar sem ég er að fara til Dominikanska lýðveldisins í nokkra daga í sept. Ef maður kemst í tölvu þar og ég tala nú ekki um á netið, gæti verið gaman að halda lysthafendum upplýstum um það sem á daga manns drífur.

Ég flýg til NY þ. 11.sept. (geðsleg dagsetning!) dvel þar eina nótt, og síðan áfram til Dominicana þar sem ég mun dvelja í u.þ.b. hálfan mánuð....

Ég er bara búinn að vera hálfslappur með einhvern djö....kvefskít og hálsbólgu. Ég held að þessi andsk...sé bara orðinn krónískur atvinnusjúkdómur, a.m.k síðan ég fékk lungnabólguna í fyrra illu heilli.

Jæja það er best a fara að ljúka þessu kjaftæði á fyrsta Slitrudegi, enda var þetta svona meira gert til að prufa. Ekki veit ég hvað ég nenni að skrifa oft eða mikið hérna, en....við skulum sjá til.

Ummæli dagsins: Það væri nú eitthvað annað ef þessir svikarar á Rúv myndu fá Hemma heim og setja hann á tali aftur í staðinn fyrir að vera að púkka upp á þetta löngu útbrunna Spaugstofulið.
(prófessor Prump, eða dr Gunni eða what ever)

Alltaf ferskur prump-popparinn...